Mtanzania aliye leta maajabu ulaya

UMEPATA kusikia jina la Dk. Asanterabi Malima?

Jambo moja ambalo wanafunzi waliosoma naye nchini Tanzania hawabishani kuhusu Malima ni ukweli kwamba alikuwa ni mwanafunzi mwenye akili nyingi darasani.

Shafii Dauda ambaye alikuwa mwanafunzi wa kidato cha kwanza katika Shule ya Sekondari Azania jijini Dar es Salaam, anamkumbuka Asanterabi kama mwanafunzi mwenye akili aliyefanya vizuri sana katika masomo yake ya kumaliza kidato cha nne.

Shafii, ambaye sasa ni miongoni mwa watangazaji na wachambuzi maarufu wa mchezo wa soka hapa nchini alikuwa kidato cha kwanza wakati Malima alikuwa kidato cha nne.

Akili ile ya Malima imemfikisha nchini Marekani ambako sasa amefanya ugunduzi wa kidude chenye saizi ya pini ndogo (milimita 0.250) kinachoweza kubaini magonjwa ya kuambukiza, kansa na moyo katika hatua ya awali kabisa.

Ugunduzi huu, utakapofika mwisho wake, unaweza kuokoa maisha ya watu wengi duniani. Fikiria tu kwamba unakuwa na kifaa ambacho mojawapo ya magonjwa hayo yakikuanza unaubaini mapema na kwenda kutibiwa.

Mamilioni ya watu wataokolewa maisha yao na kijana huyu wa Kitanzania.

Pamoja na mambo mengine, kifaa hicho kitaweza kusababisha wataalamu kubaini endapo mtu yupo kwenye hatari ya kuambukizwa magonjwa ya kuambukizwa, kansa pamoja na yale ya moyo.



Huu ni ugunduzi ambao umeisisimua Marekani na unataraji kuisisimua dunia. Jambo zuri ni kwamba tayari wenzetu wameliona hilo na tayari wameanza kumtuza kijana huyo wa Kitanzania.



Ni ajabu kwamba serikali yake imekuwa kimya hadi leo kumtuza. Ukiondoa Taasisi ya Sayansi na Teknolojia (COSTECH) ambayo hata robo ya Watanzania hawaifahamu, serikali imekuwa kimya sana kwenye suala hili.



Kama Asanterabi angekuwa msanii, mwanamichezo au mwanasiasa, leo hii tungesikia maandamano makubwa yameandaliwa kwa ajili ya kumpongeza. Lakini kwa sababu ambazo haziko wazi, kuna ukimya umetanda kwa mgunduzi huyu.



Tumeshindwa kuona hata akialikwa Ikulu au kupongezwa tu na taasisi hiyo kubwa wakati tumeona watu waliofanya mambo ya kawaida kabisa wakipewa fursa hiyo. Tunaona kwamba hili ni tatizo kwa Taifa letu.



Namna pekee ambayo Taifa letu linaweza kuchochea vijana kupenda kusoma na kuamini kwamba mtu anaweza kuheshimika na kufanikiwa kimaisha endapo tu atasoma na kufanya kazi kwa bidii, ni kuwapa heshima watu kama Asanterabi.



Itasikitisha sana endapo serikali yetu itakaa kimya na kuacha suala hili liende hivihivi tu wakati tayari serikali ya Marekani imeona kijana huyu amefanya nini. Kama ugunduzi wake huu utapita, kuna kila dalili kwamba kijana huyu atakuja kuwa tajiri mkubwa.



Je, atawekeza katika nchi ambayo imempa ushirikiano na kuna uhakika wa kufanya biashara kuliko kwenye nchi nyingine ambayo uhusiano pekee alionao ni kwamba alizaliwa na kukulia huku?



Katika mahojiano yake na gazeti hili, aliweka wazi kwamba anaumizwa na hali ya elimu hapa nchini na atakutana na wenzake walio Marekani kuangalia ni kwa namna wanaweza kusaidia.



Sasa mtu kama huyu Taifa linawezaje tu kumwamgalia na kumuona kama mtu wa kawaida na asiyefaa kutuzwa japo kwa maneno tu?



Wakati Rais Jakaya Kikwete atakapokuwa akiwapa tuzo Watanzania mbalimbali wakati wa maadhimisho ya Siku ya Uhuru wa Tanganyika Desemba 9 mwaka huu, tutashangaa kama jina la Dk. Asanterabi Kighoma Malima halitakuwapo miongoni mwa watuzwaji.